વીર મોખડાજી ગોહિલનો રાહડો

વીર મોખડાજી ગોહિલનો રાહડો 

( ઢાળ : સૂની રે ડેલી ને સૂના ડાયરા )

મોખરે હાલ્યો એ ગોહિલ મોખડો

તેજ મેવાડી ધરી એ તલવાર રે

રંગ છે રાણાના મોખરે હાલ્યો એ ગોહિલ મોખડો !

માથે કર હતા મહાકાળીના 

શિવ આરાધી કરે એ સંભાળ રે 

રંગ છે રાણાના મોખરે હાલ્યો એ ગોહિલ મોખડો !

ખોખરા ને ઘોઘા કર્યા ખાલસા 

ભેળવી એ ઉમરાળા ને ભીમડાદ રે

રંગ છે રાણાના મોખરે હાલ્યો એ ગોહિલ મોખડો !

કેશરીના કટકા કાંઠે કરીયા

બેઠો બેટે પીરમને એ બાર રે

રંગ છે રાણાના મોખરે હાલ્યો એ ગોહિલ મોખડો !

દિલ્હીથી કટક ઘોઘે દોડીયા 

શૂરા તેં તો મહિના રોક્યા ચાર રે

રંગ છે રાણાના મોખરે હાલ્યો એ ગોહિલ મોખડો !

ઘોઘે એ કાઢ્યા કચ્ચરઘાણ જે 

વાવટો ધોળો જોઇને થોભ્યા વાર રે

રંગ છે રાણાના મોખરે હાલ્યો એ ગોહિલ મોખડો !

મીટુ અવળી ભાળી મહમદની 

બેઉ હાથે ફરી કરી એ બે ધાર રે

રંગ છે રાણાના મોખરે હાલ્યો એ ગોહિલ મોખડો !

સેંકડોને ખજુરિયે એ ચીરીયા 

પડ્યુ શિષ ને ધડ કરે પ્રહાર રે

રંગ છે રાણાના મોખરે હાલ્યો એ ગોહિલ મોખડો !

ખદરપરે સુતો ખેલ ખેલીને

સાત કોષ એ કરીને સંહાર રે 

રંગ છે રાણાના મોખરે હાલ્યો એ ગોહિલ મોખડો !